एप्पलको सहयोगबिनै आइफोन अनलक

सुरक्षा प्रणाली सङ्घीय जाँच ब्यूरो (एफबीआई)ले क्यालिफोर्नियाको सेन बर्नारडिनोमा गोलाबारी गरी १४ जनाको हत्या गर्ने आक्रमणकारी सैयद फारुकको आइफोनलाई एप्पलको सहयोगबिना ‘अनलक’ गर्न सफलता हासिल गरेको छ । 
एप्पलले फारुकको आइफोन अनलक गर्न मानेको थिएन ।  एफबीआईले फोन अनलक गर्न माग गर्दै अदालतमा मुद्दा दर्ता गरेको थियो ।  पाकिस्तानी मूलका फारुकले श्रीमती तस्फिन मलिकसँग मिलेर गएको डिसेम्बर २ मा सान बर्नाडिनोमा अन्धाधुन्ध गोली चलाएका थिए ।  त्यस घटनामा फारुक र उनकी श्रीमती दुवै प्रहरीको कारबाहीमा मारिएका थिए ।  अमेरिकाको कानुन मन्त्रालयले फारुकको आइफोन अनलक गरेपछि अदालती प्रक्रियाको समेत अन्त्य भएको जनाएको छ ।  एप्पल कम्पनीले ग्राहकको विश्वसनियतामा कुनै सम्झौता नगर्ने भन्दै त्यो आइफोन अनलक गर्न मानेको थिएन ।