दश वर्षे जानीले गरे इन्स्टाग्राम ह्याक फेसबुकले दियो १० हजार डलर पुरस्कार

तस्बिर सेयरिङ गर्ने सामाजिक सञ्जाल, इन्स्टाग्राममा रहेको त्रुटि (बग) फेला पारेका १० वर्षे बालकलाई फेसबुकले १० हजार डलर पुरस्कार दिएको छ ।
 हेलसिन्कीमा बसोबास गर्दैआएका ‘जानी’ नाम गरेका ती बालकले प्रयोगकर्ताले इन्स्टाग्राममा लेखेका अक्षरलाई हटाउन मिल्ने त्रुटि फेला पारेर फेसबुकबाट १० हजार डलरको पुरस्कार प्राप्त गरेका हुन् ।
जोनीले इन्स्टाग्राममा फेला परेको सुरक्षा त्रुटी पत्ता लाग्ने बित्तिकै फेसबुकमा इमेल पठाएका थिए । फेसबुकले जानीका लागि एउटा टेस्ट एकाउन्ट बनाएर आफ्नो दाबीको प्रमाण पेस गर्न लगाएको थियो ।
 साथै जानीले आफ्नो खोजलाई प्रमाणित गर्न कम्पनीकै टेस्ट अकाउन्टबाट इन्स्टाग्रामको एउटा कमेन्ट हटाएर पनि देखाएका थिए ।
 जानीले आफूले पाएको पुरस्कार रकमबाट आफ्ना भाईहरूका लागि नयाँ बाइक, फुटबल खेल्ने सामग्री तथा कम्प्युटर खरिद गर्ने योजना बनाएको बताएका छन् । फेसबुकले यस्ता अनलाइन सुरक्षा त्रुटी पत्ता लगाउनेलाई बग बाउन्टी नामक पुरस्कार दिने गरेको छ । बीबीसीका अनुसार सन् २०११ बग बाउन्टी अन्तर्गत उसले ४३ लाख डलर बाँडिसकेको छ ।