‘पोकेमन गो’ ले निम्त्यायो समस्या

विश्व चर्चित रियालिटी गेम ‘पोकेमन गो’को चर्चा सेलाउन नपाउँदै यसले निम्त्याएका समस्याका बारेमा बहस हुन थालेको छ ।  अन्तर्राष्ट्रिय समाचारमाध्यमका अनुसार हालसालै जापानमा ‘पोकेमन गो’ खेलिरहेका चालकले एक महिलालाई ठक्कर दिएपछि महिलाको मृत्यु भएको छ ।  ३९ वर्षीय चालकले दुईजनालाई ठक्कर दिएकोमा एकको मृत्यु भएको छ भने अर्की गम्भीर घाइते भएकी छिन् ।  साथै यो दुर्घटनाको समाचार सुनेपछि पोकेमनका गो निर्माता ‘नियान्टिक’ले मृतकको परिवारप्रति समवेदना व्यक्त गरेको बताइएको छ ।  ‘पोकेमन गो’ खेल्दा खेलाडी हिँड्नुपर्ने हुन्छ ।  यो एपले चलिरहेको सवारीमा खेलाडी भएमा चेतावनी तथा सूचना दिन्छ ।  यो खेल खेल्दा खेलाडी हिँड्नुपर्ने भएकाले विभिन्न देशका संवेदनशील तथा पुरातात्विक क्षेत्रमा खेल्न निषेध
गरिएको छ ।